सातदोबाटोमा रोकेर राखेको बसमा आगलागी

ललितपुर, ३ कात्तिक (रासस)
ललितपुरको सातदोबाटोमा रोकेर राखिएको सार्वजनिक बसमा आगलागी भएको छ ।
ललितपुर महानगरपालिका–१५ सातदोबाटो चोक नजिक रोकेर राखेको अवस्थामा आज अपराहृन चक्रपथमा चल्ने महानगर यातायातको बा४ख १०६ नंको बसमा आगलागी भएको जिल्ला प्रहरी कार्यालय ललितपुरका सूचना अधिकारी तथा प्रहरी उपरीक्षक रवरत्न पौडेलले दिनुभयो ।
सातदोबाटोबाट ग्वार्कोतर्फ जाँदै गरेको बस “बस पाकेट”मा रोकेर राखिएको अवस्थामा अचानक तार “सट” भई आगलागी भएको उहाँले जानकारी दिनुभयो । बसमा आगलागी भएको खबर प्राप्त हुनासाथ प्रहरी टोली र ललितपुर महानगरपालिकाका दुई वटा दमकल प्रयोग गरेर आगो निभाइएको थियो । आगलागीबाट बस पूर्ण रूपमा क्षति भएको छ ।