वीरगंज, १७ जेठ । जिल्ला प्रहरी कार्यालय पर्साले चोरीका पाँच थान साइकलसहित एक जनालाई पक्राउ गरेको छ।
प्रहरीले वीरगंज महानगरपालिका वडा नं. २४ रामगढवा बस्ने २६ वर्षीय लाल महम्द अन्सारीलाई चोरीका साइकलसहित नियन्त्रणमा लिएको हो।
प्रहरीका अनुसार गत जेठ १३ गते दिउँसो करिब ४ः०० बजेको समयमा वीरगंज महानगरपालिका वडा नं. १५ एनएमसी भित्रबाट बाराको प्रसौनी गाउँँपालिका वडा नं. ५ प्रस्टोका बस्ने २२ वर्षीय बिशाल साहको साइकल चोरी भएको थियो। साहले आफ्नो साइकल पार्किङ गरी राखेको स्थानबाट हराएपछि खोजतलासका लागि वडा प्रहरी कार्यालय श्रीपुरमा निवेदन दिएका थिए।
निवेदन परेलगत्तै खटिएको प्रहरी टोलीले उक्त क्षेत्रको सीसीटीभी फुटेजको आधारमा प्राविधिक विश्लेषण गर्दै जाँदा जेठ १६ गते राति १०ः३० बजेको समयमा चोरीमा संलग्न अन्सारीलाई फेला पारेको थियो।
पक्राउ पर्ने समयमा अन्सारीको साथबाट बिशाल साहको चोरी भएको साइकलसहित अन्य विभिन्न स्थानबाट चोरी गरिएका थप ४ थान गरी जम्मा ५ थान साइकल बरामद गरिएको जिल्ला प्रहरी कार्यालय पर्साका प्रवक्ता एवं सूचना अधिकारी प्रहरी नायब उपरीक्षक हरि बहादुर बस्नेतले जानकारी दिनुभयो।
साइकलसहित नियन्त्रणमा लिइएका अन्सारीमाथि चोरी सम्बन्धी कसूरमा हिरासतमा राखी थप अनुसन्धान कार्य भइरहेको प्रहरीले जनाएको छ।