विभेदकारी विज्ञापन नीतिविरूद्ध पर्साका पत्रकारको धर्ना

सहारा संवाददाता–––––––––––––––
वीरगंज, २७ जेठ ।
नेपाल पत्रकार महासंघ पर्साले सरकारी सूचना तथा विज्ञापन वितरणमा अपनाइएको नीतिको विरोधमा बुधवार जिल्ला प्रशासन कार्यालय अगाडि धर्ना दिएका छन्।
एक घण्टे धर्ना कार्यक्रममा सहभागी सञ्चारकर्मीहरूले सरकारी सूचना तथा विज्ञापनमा समान पहुँच सुनिश्चित गर्न माग गरेका छन। उनीहरूले हाल लागू गरिएको नीतिले मोफसलका सञ्चारमाध्यमलाई विभेद गरेको आरोप लगाएका छन।
पत्रकारहरूले प्रेस स्वतन्त्रता, निष्पक्ष सूचना प्रवाह तथा सञ्चारमाध्यमको अधिकारमाथि असर पर्ने खालका व्यवस्था तत्काल खारेज गर्न सरकारसँग माग गरेका छन। उनीहरूको भनाइमा पछिल्लो नीतिले सञ्चार क्षेत्रभित्र असमानता र विभाजन सिर्जना गरेको छ।
धर्ना कार्यक्रममा नेपाल पत्रकार महासंघ पर्साका पदाधिकारी, सञ्चारकर्मी तथा विभिन्न सञ्चार संस्थाका प्रतिनिधिहरूको सहभागीता रहेको थियो। महासंघले सञ्चार क्षेत्रको हितविपरीतका निर्णय फिर्ता नभए थप आन्दोलनका कार्यक्रम घोषणा गर्ने चेतावनीसमेत दिएको छ।