वीरगंज, २५ जेठ । अख्तियार दुरूपयोग अनुसन्धान आयोगले वीरगंज महानगरपालिकाका नगरप्रमुख राजेशमान सिंहसहित सातजनाविरूद्ध भ्रष्टाचार मुद्दा सम्बन्धी आरोपपत्र दायर गरेको छ ।
गलत लिखत, सरकारी कागजात सच्याउने, सरकारी कागजात नोक्सान गर्ने तथा गलत प्रतिवेदन तयार गरी भ्रष्टाचार गरेको आरोप लगाउँदै अख्तियारले सोमवार विशेष अदालत काठमाडौंमा आरोपपत्र दायर गरेको जनाएको छ ।
अख्तियारले मुद्दा दायर गरेका अन्यमा सिन्धुपाल्चोकको इन्द्रावती गाउँपालिका–१० की रिता भट्टराई, वीरगंज महानगरपालिका–३ का तत्कालीन वडासचिव भिखारी राय, तत्कालीन वडासदस्य तुफैल अख्तर ठकुराई, गृह मन्त्रालयका तत्कालीन उपसचिव पुस्कर राना र शाखा अधिकृत पर्शुराम पोखरेल छन् ।
वीरगंज महानगरपालिकाका नगरप्रमुख सिंहले गलत विवरण पेस गरी भट्टराई थर भएको महिलाको छोरीलाई आफ्नी छोरी रूविना श्रेष्ठ बनाई नागरिकताको प्रमाणपत्र दिलाएको भन्ने उजुरी परेपछि अख्तियारले अनुसन्धान अघि बढाएको थियो ।
अनुसन्धानका क्रममा सिंहले वीरगंज महानगरपालिका–३ का तत्कालीन वडासचिव राय, तत्कालीन वडासदस्य ठकुराई र जिल्ला प्रशासन कार्यालय पर्साका तत्कालीन प्रशासकीय अधिकृत षडकुमार पोख्रेलसँग मिलेमतो गरी अर्काको छोरीलाई आफ्नो भनी गलत व्यहोरा खुलाई रूविना श्रेष्ठको जन्मदर्ता प्रमाणपत्र तयार पारेको अख्तियारले जनाएको छ ।
जन्मदर्ता प्रमाणपत्रका आधारमा नागरिकता सिफारिस तयार गरी जिल्ला प्रशासन कार्यालय, पर्साबाट मिति २०७५ साउन १३ गते रूविना श्रेष्ठका नाममा नागरिकता प्रमाण पत्र लिएको अख्तियारद्वारा सोमवार जारी विज्ञप्तिमा जनाइएको छ ।
उनीहरूले सरकारी निकाय वा सार्वजनिक संस्थाको कागजातमा अनाधिकार एवं गैरकानुनी तरिकाले सच्याउने, केरमेट गर्ने, थपघट गरी हेरफेर गर्ने गराउने र कागजात लुकाउने, नोक्सान पुर्याउने एवं नष्ट गर्ने गराउने कार्य गरेको पाइएको अख्तियारको विज्ञप्तिमा उल्लेख छ ।
गृह मन्त्रालयका तत्कालीन उपसचिव पुस्कर राना र तत्कालीन शाखा अधिकृत पर्शुराम पोखरेलले गैरकानुनी तवरवाट नागरिकता प्रदान गरेको सम्बन्धमा सत्यतथ्य बुझ्न गठित छानबिन समितिको संयोजक र सदस्य रही कार्य गरेका थिए । तर, उनीहरूले गलत व्यहोराको प्रतिवेदन तयार गरेको ठहर अख्तियारले गरेको प्रवक्ता सुरेश न्यौपानेले जानकारी गराएका छन् ।